Міжземнамор'е / Méditerranée

Міжземнамор'е вышыванае -- чарговае вітанне сёлетняга лета. Меркавала зрабіць яго цэнтрам наўлечкі, але сыну закарцела аздобіць рамкаю. І каб на вачах было.

Лета, Восень, Каляды/ Été, Automne, Noël

Вяночкі -- летні, восеньскі, калядны  -- вышываныя для сашэ. Для ружавых пялёсткаў, лаванды, гваздзікоў -- чым там яшчэ ладуюць-набіваюць цацачныя падушачкі для шафы? Сашэ мусілі шыцца пад час адпачынку, але... Два гады стаіць нераспакаванаю новая машынка (хутка і гарантыя скончыцца!), запасяцца вышываныя вяночкі, сабачкі, паненкі; купляецца канва ў кропкі і плямкі, а то й фарбуецца самастойна -- кавай, гарбатай...  І не шыецца нічога.

Лета -- Восень-- Каляды

Ранішняя гарбата / Тhé du matin

Паненку з імбрыкам пад назвай "Ранішняя гарбата" кампанія "Золотое руно" пусціла ў свет гадоў дзесяць таму, але сёння набор ужо зняты з вытворчасці.  Дызайн Канстанціна Харытонава я ўпадабала хіба таму, што дзяўчына з выявы і постаццю, і выразам твару  аддалена нагадала гераіню "Бара ў Фалі-Бержэр" Эдуарда Манэ (улюбёныя творы мае кожны), а таксама (адначасова)  распрацоўкі сярэдзіны мінулага стагоддзя, як у бабулі -- без  бэка, без крыжыкавых чвэртак і паловак. Нават светлавы адбітак у воку -- поўны крыжык.

 Вынік: вышываць узялася толькі сёлета, на руках і твары мяняла "парсючковы" ружовы колер (рабіла бленд, падбіраючы паводле палітры ДМС, але больш за астатнія ўпасавалі ніткі ПНК -- піцерскія!). Усё - у дзве ніткі.
Пластыкавая рамка, антыблікавае шкло, памер 22, 5 х 37.

Замак на Луары /Château de Sully-sur-Loire

Зманлівыя вежы ад "Панны" называліся  "Замак на Луары". Я агледзела, што  распрацоўніца дызайна  -- Людміла Інякіна, якую вельмі шаную і "Замак...", натуральна, трапіў да мяне ў будову... амаль на два гады. Памер 45 x 24.5 см. Рама з так званым сліпам, музейнае шкло.

Château de Sully-sur-Loire

Яшчэ адзін маленькі карабельчык/ Un autre petit navire

Марское падарожжа працягваецца: ангельскі дызайн, краявіды і нават туманы паўставалі на сынаву замову. Хутка-порстка.

Ну, не без таго, каб год вылежацца ў чаканні абрамлення і наступны год павандраваць па сценах кватэры.

Быў сабе маленькі карабельчык /Il était un petit navire

Кранальны маленькі карабельчык, відавочна, маляваны з  ангельскіх краявідаў, хоць бы таму, што ягоная аўтарка - знакамітая Марыя Дыяз (Maria Diaz). 

Карабельчык вось-вось паплыве

Аднаўленне / Восстановление

Я здолела аднавіць блог! Пасля ўсіх мітрэнгаў, страчаных тэкстаў і фота, ужо была памеркавала, як давядзецца пачаць нанова.

Містэр Тумнус з Люсі

Спадзяюся... / J'espère que ...

Хварэць - цяжка. Ачуньваць - балюча. Трэба цярпець - цярплю. Хадзіць? Хаджу! Не вельмі хутка, але самастойна. Укленчыць магу! Сесці на кукішкі яшчэ не магу... Ну і рукі пацягнуліся ўслед за нагамі. Правая заўжды паводзіла сябе прыстойна,  а левая мусіла  - і здужала! Магу ўтрымаць шадэлак!

Шасцёра катоў звязаныя для латарэі, якую ладзіў кашэчы прытулак. Кветачкі-брошкі здымныя, іх можна адшпіліць і прыладзіць быля-куды. Вязала... доўга. Дзякую ўсім, хто падтрымліваў мяне жартамі і станоўчымі прыкладамі з жыцця. Спадзяюся на лепшае.

Добрага свята / Joyeuses Fêtes

Летняе вітанне / Salutations de l'été

Жнівеньскае прывітанне: маленькія торбачкі.Магчыма, у гаспадарцы яны без асаблівае патрэбы, але асталяваліся на варэнай і прыдаліся. Галоўнае, вядома, яблыкі!

Для сястры / Pour ma soeur

Рабіць сабачыя аброжкі  мяне натхніла сястра. Рабіць брошкі мяне таксама спакусіла сястра. Вязаныя, шытыя, вышываныя, з пацеркамі і шклянымі перламі. Застаецца прыдумаць нешта цікавоцкае для сястры. На сёння самая адметная - кветачка з паабшыванымі пялёсткамі. А заўтра буду думаць...

P.S. Пад скаротам (plus d'info)- больш сціплыя аздобы для яе. А сястра - малодшая!

Трэці шлях / La troisième voie

Спадарыня Ірына Варабей - празаік, журналістка, перакладчыца, майстрыха-дызайнер, фатограф, аўтарка адметных мадэляў на падставе беларускіх традыцыйных матываў ды вобразаў, а таксама і перадусім наша шчырая сяброўка па захапленні. Праз яго Ірына распачала сваю дызайнерскую дзейнасць у Таронта, а таксама вытворчасць паводле ўласных распрацовак пад брэндам  Spirit of Belarus.

З дазволу Ірыны пад скаротам (plus d'info) падаю яе адметны матэрыял пра наша нацыянальнае гафцярства (вышыванне).

 

З сабакам / Avec un chien

Адклад ня йдзе ў лад. Але... адкладаем. У выніку праз славутае "потым-потым" добрыя  рэчы гадамі вандруюць па паліцах. А патрэбны найсціплы штуршок -  часу, моды ці чаго-небудзь, каб скончыць, надзець (апрануць) і мець!

Мадэль швэдра ўзятая з часопіса "Verena" дзевяностых (!) гадоў. Вязана пруткамі з бавоўны так званай інтарсійнай тэхнікай. Сабака цалкам вышываны па вочках. У дызайнера над вязанай паненкай  парасон, але тады мой швэдар атрымліваўся задужа доўгі. Парасон прынцыпова пакінуты - на спіне.