Каляндарны студзень / Janvier calendrier

Рабіць разам  каляндар ад Lizzie Kate прыдумала Алена (пра ўмовы ўдзелу ў супольным праекце можна пачытаць тут). Яе прапанову я ўбачыла пры канцы студзеня і вельмі хацела паспець у тэрмін. Але ж і рабіць нешта бязмэтна, проста каб зрабілася (а потым качалася ў шафе да лепшых часоў), зусім не па мне...

Усё вырашыў колер канвы. Какава-парашок! Люблю гэты дзіўны колер, які цудоўна стасуецца і  з падушкамі, і з пакаванкай, і з абажурам...  І, натуральна, з варэннай (кухняю), дзе мінае важная частка жыцця. А ў студзені самы час сядзець на варэннай з кубкам гарачага напою...  (Толькі не какавы! Колер - люблю, а напой няхай хто хоча, той і п'е.)

Карацей, давялося трошкі спрасціць прапанову дызайнера (і так вельмі простую), беручы пад увагу  ідэю каляндарнага арганайзера. І хоць з усіх вышываных календароў я люблю толькі адвенты, прасцей ўвасобіць дванаццаць кішэнек па месяцах замест дваццаці чатырох па днях!