Клэр / Claire

Распрацоўкі Клэр мяне зачаравалі. Паланілі. 

Спачатку адабралі палову летняга адпачынку: я сумленна прачэсвала яе блог gazette94, але не па тэмах, а па публікацыях. Каб расцягнуць радасць знаёмства. 

Віншаванне з Раством

Потым да чарноцця сшыла цалюткую японскую іголку. Потым вымагла віртуальнай аўтарскай падтрымкі. 

Марскія мары з пахам лаванды

А потым Клэр абвясціла, што зачыняе блог з асабістых прычын. Але ў мяне асабіста ёсць надзея, што яна без нас засумуе. І вернецца. (Дарэчы, яе віртуальныя альбомы ўсё яшчэ папаўняюць майстрыхі з усяго свету.) 

Лістуемся мы да сёння. Шчыра заяўляю, што хацела б пабачыць важкі том grilles ад Клэр, каб мець працу да старасці. Невялікія, нестракатыя, утульныя дызайны Клэр я без цырымоній ужываю для сашэ, падвесак, елачных цацак і асабліва для падарункаў à l'occasion: дадаю надпісы, аблямоўкі, дэталькі...

Канва ўжывана наша, баранавіцкая (часткова баваўняная, часткова лён з бавоўнаю), ніткі піцерскія. Усё падабрана на вока.